Har qanday kasbni egallash turli omillarga ko‘ra belgilanadi. Bu omillar ayrim holatlarda bo‘lajak mutaxassis uchun professional faoliyat yo‘lidagi dastlabki odimlar vazifasini o‘taydi. Fazliddin Berdiyevning kasblar haqidagi tasavvurlari shakllangan davrlardayoq unda faqat bitta kasbga – rassomlikka qiziqish bo‘lgan. Uning tasviriy san’at sohasidagi dastlabki saboqlari bolaligidan o‘chmas xotira bo‘lib qolgan “G‘uncha” va “Gulxan” jurnallari bo‘lgan. Yosh rassom jurnal sahifalaridagi rasmlarni, ayniqsa, illyustrator rassomlar tomonidan chizilgan rasmlarni ishtiyoq bilan, zo‘r qiziqish bilan ko‘chirar va ularni avaylab saqlar edi.